खास प्रतिनिधी | गोपनीय खबऱ्या
आष्टा येथील लक्ष्मीबाई नायकवडी नगरमध्ये पती-पत्नीमधील वादातून झालेल्या गैरसमजात सीआरपीएफ जवानावर अंदाजे १५ जणांच्या जमावाने हल्ला केला. ही घटना दि. २० जून रोजी सकाळी सव्वाअकराच्या सुमारास घडली.
आष्टा पोलिसांकडून मिळालेल्या माहितीनुसार, सुमित शशिकांत घस्ते (वय ३०, रा. लक्ष्मीबाई नायकवडीनगर, आष्टा) हे सीआरपीएफमध्ये कॉन्स्टेबल म्हणून कार्यरत आहेत. दि. १९ जून रोजी पती-पत्नीतील घटस्फोटासंदर्भातील वाद मिटविण्याचा प्रयत्न सुरू असताना दोघांमध्ये शाब्दिक वाद झाला होता.
त्यानंतर दुसऱ्या दिवशी, दि. २० जून रोजी सकाळी सुमारे सव्वाअकराच्या सुमारास, पत्नीला मारहाण केल्याचा गैरसमज झाल्याने गोटखिंडी (ता. वाळवा) येथील अविनाश भानुदास लोंढे, राम मस्के, निखिल दाभाडे, आदित्य दाभाडे, प्रमोद लोंढे, स्नेहा घस्ते, मनीषा लोंढे तसेच इतर सात ते आठ अनोळखी व्यक्तींनी सुमित घस्ते यांच्यावर हल्ला केला.
संशयित आरोपींनी लोखंडी पाईप, चाकू, दगड, काठ्या तसेच लाथाबुक्क्यांनी मारहाण करून त्यांना गंभीर जखमी केले, तसेच अविनाश लोंढे याने सुमित घस्ते यांच्या बहिणीचा विनयभंग केल्याचा आरोप करण्यात आला आहे. याबाबत जखमी सुमित घस्ते यांनी आष्टा पोलिस ठाण्यात गुन्हा दाखल केला असून, पोलिस अधिक तपास करत आहेत.
