जत प्रतिनिधी | गोपनीय खबऱ्या
जतमध्ये सध्या सुरू असलेल्या निवडणुकीकरिता नगराध्यक्ष पदासाठी डॉ. रवींद्र अरळी हे सक्षम उमेदवार नाहीत, असा घरचा आहेर भाजपचे ज्येष्ठ नेते ऍड.श्रीपाद अष्टेकर यांनी दिला आहे. त्यामुळे डॉ. रवींद्र आरळी यांच्या उमेदवारी वरून भाजपमध्ये मोठ्या प्रमाणात खदखद सुरू असल्याची चर्चा सुरू आहे.
ॲड. श्रीपाद अष्टेकर म्हणाले की, डॉ. रवींद्र आरळी हे नगराध्यक्ष पदासाठी सक्षम उमेदवार नाहीत. माझे आणि त्यांचे अतिशय चांगले स्नेह संबंध आहेत. यासाठी मी माझे प्रामाणिक मत व्यक्त करीत आहे. डॉ. आरळी यांना त्यांच्या व्यापातून नगराध्यक्ष पदासाठी वेळ देता येणार नाही. नगराध्यक्ष हा रोज जनतेला वेळ देणारा असावा. त्यांचे हॉस्पिटल, कॉलेज, सांगलीतील हॉस्पिटल हा सगळा व्याप पाहता ते नागरिकांना दररोज उपलब्ध होऊ शकणार नाहीत. ते दररोज नगरपरिषद कार्यालयात येऊ शकतील का.? हा प्रश्न आहे. मी हा विषय त्यांच्याशी वैयक्तिक बोललो आहे. त्यांनी व पक्षाने याचा पुनर्विचार करावा, हे माझे वैयक्तिक मत असल्याचे भाजपचे जेष्ठ नेते ॲड. श्रीपाद अष्टेकर म्हणाले.
