खास प्रतिनिधी | गोपनीय खबऱ्या
मिरज शहरातील भाजप मधील नाराज कार्यकर्ता राष्ट्रवादी (अजित पवार गट) काँग्रेस पार्टीच्या गळाला लागल्याची चर्चा जोरदार सुरू आहे. सांगली मिरज कुपवाड महानगरपालिकेच्या मागील निवडणुकीत भाजपकडून उमेश हारगे नावाच्या कार्यकर्त्याला प्रभाग क्रमांक सहा मधून निवडणूक लढवण्याची संधी देण्यात आली होती. पराभवानंतरही आज अखेरपर्यंत उमेश हारगे हे माजी मंत्री,आमदार डॉ. सुरेश खाडे यांचे कट्टर समर्थक म्हणून ओळखले जात होते. अलीकडच्या काळात भाजपमध्ये गटाचे राजकारण सुरू झाल्याचे उमेश हारगे यांच्याकडून वारंवार मित्रमंडळींमध्ये चर्चेदरम्यान सांगण्यात येत होते.
यापूर्वी भाजपचे ईश्वर जनवाडे, संदीप कबाडे यांनी इद्रिस नायकवडी यांच्या नेतृत्वाखाली राष्ट्रवादीमध्ये प्रवेश केला होता. आज आमदार इद्रिस नायकवडी यांच्यासोबत मुंबई येथील देवगिरी ह्या शासकीय निवासस्थानी राज्याचे उपमुख्यमंत्री, राष्ट्रवादी काँग्रेसचे प्रमुख अजित पवार यांची ईश्वर जनवाडे व उमेश हारगे यांनी भेट घेतली.
या भेटीदरम्यान येणाऱ्या स्थानिक स्वराज्य संस्थांच्या निवडणुकांबाबत नेते अजित पवार यांच्यासोबत सविस्तर चर्चा करण्यात आल्याची माहिती इद्रिस नायकवडी यांच्या अधिकृत फेसबुक पेजवरून जाहीर करण्यात आली.
यावेळी राष्ट्रवादी काँग्रेस पार्टीचे मिरज शहर अध्यक्ष ईश्वर जनवाडे यांच्यासहित इतर कार्यकर्ते उपस्थित होते.
