खास प्रतिनिधी | गोपनीय खबऱ्या
मिरजेतील बोलवाड रोडवरील हनुमाननगरमध्ये तीन चोरट्यांनी घरात घुसून वृद्ध दाम्पत्याला मारहाण करून जबरी चोरी केल्याचा प्रकार उघडकीस आला आहे. चोरट्यांनी सोन्याचे दागिने व रोकड असा चार लाखाचा मुद्देमाल लंपास केला.चोरट्यांच्या हल्ल्यात वृद्ध दाम्पत्य जखमी झाले. या घटनेने मिरज शहरात खळबळ उडाली आहे.
बाळासाहेब महादेव लांडगे (वय ६५) व पत्नी लक्ष्मी लांडगे अशी जखमींची नावे आहेत. बोलवाड रस्त्यावर हनुमाननगरमध्ये फिर्यादी लांडगे यांचे पत्रावजा घर आहे. तिथे ते, पत्नी लक्ष्मी, मुलगा व सून राहतात. गुरुवारी मध्यरात्री तीन चोरट्यानी दरवाजा तोडून घरात प्रवेश करून घरातील बाळासाहेब लांडगे यांना जबर मारहाण केली. तिघांनी हातात धारदार हत्यार घेऊन धाक दाखवित दमदाटी केली. तोंड दाबून लक्ष्मी यांच्या कानातील दीड तोळे वजनाची सोन्याची फुले हिसकावली.
गळ्यातील एक तोळ्याचे मंगळसूत्र, हातातील अर्ध्या तोळ्याची अंगठी मोबाईल तसेच ऊस लागवडीसाठी ठेवलेले रोख ५० हजार, दुधाचे आलेले बिल रोख ५ हजार ५०० रुपये, लाडकी बहीण योजनेचे ६ हजार आणि अन्य १० ते १५ हजारांची रोकड, असे ९० हजार रुपये रोख लंपास केले. चोरट्यानी एकूण ४ लाख रुपयांचा ऐवज लुटला.
लक्ष्मी यांच्या कानाला जबर दुखापत झाली. यावेळी बाळासाहेब यांनी चोरट्यांना प्रतिकार करण्याचा प्रयत्न केला. पण त्यांना मारहाण करीत चोरट्यांनी काढता पाय घेतला. यावेळी घरात त्यांची सून होती. पण ती बाजूच्या खोलीत झोपली होती, तर वाहनचालक असलेला मुलगा बाहेरगावी गेला होता.
घटनेची माहिती मिळताच मिरज शहर पोलिसांनी घटनास्थळी धाव घेतली. जखमी बाळासाहेब व लक्ष्मी यांना उपचारासाठी मिरज शासकीय रुग्णालयात दाखल करण्यात आले. स्थानिक गुन्हे अन्वेषणचे पोलिस निरीक्षक सतीश शिंदे व त्यांच्या पथकानेही भेट दिली. या घटनेची नोंद मिरज शहर पोलिसांत झाली असून चोरट्यांच्या शोधासाठी पोलिसांची पथके रवाना झाली आहेत.
