- खास प्रतिनिधी | गोपनीय खबऱ्या
भारत सरकारच्या ‘नशामुक्त भारत’ या अभियान अंतर्गत महात्मा गांधी चौक पोलिसांनी अंमली पदार्थावर बडगा उगारत मोठी कारवाई केली आहे. गांजासारख्या अंमली पदार्थावर अल्पावधीत चौथी कारवाई करत तब्बल दोन किलो सातशे ग्रॅम वजनाचा सुमारे ६७ हजार ५१० रुपये किमतीचा गांजा जप्त करण्यात आला आहे. हा गांजा तीन अल्पवयीन मुलांकडून ताब्यात घेण्यात आला आहे. सदरची कारवाई मिरजेतील रॉकेल डेपो झोपडपट्टी येथे करण्यात आली आहे.
महात्मा गांधी चौक पोलिसांच्या गुन्हे प्रकटीकरण शाखेला मिळालेल्या गोपनीय माहितीनुसार, तीन अल्पवयीन बालके सदरचा गांजा विक्री करण्याच्या उद्देशाने येत असल्याची माहिती मिळाली. याच मिळालेल्या माहितीनुसार पोलिसांनी सापळा रचून संबंधित तीन अल्पवयीन बालकांना ताब्यात घेतले व त्यांच्याकडून सुमारे दोन किलो सातशे ग्रॅम वजनाचा गांजा जप्त केला. महात्मा गांधी चौक पोलीस ठाण्याकडील गुन्हे प्रकटीकरण शाखेने एक महिन्याच्या कालावधीत अंमली पदार्थ विरोधी कारवाईत लक्षणीय सातत्य राखून चौथी प्रभावी कामगिरी केली आहे.
सदरची कारवाई पोलीस अधीक्षक संदीप घुगे, अप्पर पोलीस अधीक्षक रितू खोकर, उपविभागीय पोलीस अधिकारी प्रणील गिल्डा, सहाय्यक पोलीस निरीक्षक संदीप शिंदे यांच्या मार्गदर्शनाखाली पोलीस उपनिरीक्षक संदीप गुरव, धनंजय चव्हाण, उदय कुलकर्णी, हेड कॉन्स्टेबल अभिजीत धनगर, सुरज पाटील, अभिजीत पाटील, जावेद शेख, मोहसीन टिनमेकर, बसवराज कुंदगोळ, विनोद चव्हाण, अमोल तोडकर, राजेंद्र हारगे, निवास माने यांनी केली आहे.
