शासकीय मुरूम चोरून नेताना ट्रॅक्टर पकडले, मुरूम चोरट्यांना इशारा…
जयसिंगपूर : उदगांव (ता.शिरोळ) येथील होत असलेल्या ग्रामीण रुग्णालयाच्या पाया उत्खनातील मुरुम गेल्या अनेक दिवसांपासून चोरुन नेला जात आहे. अखेर रात्री साडे नऊच्या सुमारास ५ ते ६ ट्रॅक्टरमध्ये जेसीबीच्या साहाय्याने मुरुम चोरुन रेल्वे स्टेशन येथे टाकण्यात येत होता. अखेर स्वाभिमानीच्या कार्यकर्त्यांनी मुरुम नेणारे ४ ट्रॅक्टर व जेसीबी अडविले. चोरुन मुरुम नेल्याचा जाब विचारुन खडेबोल सुनावले.
माजी समाजकल्याण सभापती स्वाती सासणे यांनी जिल्हाधिकारी तर स्वाभिमानी नेते सावकार मादनाईक यांनी तहसिलदार यांना ही माहिती दिल्यानंतर रात्री १२ वाजता ५ ते ६ तलाठी, मंडळ अधिकारी यांच्या माध्यमातून पंचनामा करुन वाहने शिरोळ तहसील कार्यालयाने जप्त केली. उदगांव येथे ग्रामीण रुग्णालयाचे काम सुरु आहे. पायामध्ये करण्यात आलेल्या उत्खननात मोठ्या प्रमाणात मुरुम निघाला आहे.
गेल्या चार महिन्यांपासून मुरुम रातोरात चोरुन लंपास केल्याचे ग्रामस्थांना निदर्शस आले होते. तर शनिवारी येथील बिरोबा यात्रा असल्याने ग्रामस्थ यात्रेत असल्याचे पाहून ठेकेदारांकडून ५ ते ६ ट्रॅक्टरच्या साहाय्याने मुरुम जयसिंगपूर रेल्वे स्टेशन परिसरात नेण्याचे काम सुरु केले होते. ही माहिती स्वाभिमानीचे शितल चौगुले, लाडू वरेकर यांच्यासह कार्यकर्त्यांना समजल्यानंतर वाहने मुरुम भरुन नेत असताना उदगांव हायस्कूलजवळ सर्व वाहने रोखून धरुन चालकांना जाब विचारला.
