सांगली ( प्रतिनिधी) मिरज तालुक्यातील बेडग येथील डॉ. बाबासाहेब आंबेडकर यांच्या नावाची कमान पाडल्या प्रकरणात कर्तव्यात कसूर केल्याप्रकरणी तत्कालीन ग्रामसेवक बी. एल. पाटील आणि विद्यमान ग्रामसेवक एम. एस. धेंडे यांना निलंबित करण्यात आले. तसे आदेश जिल्हा परिषदेच्या मुख्य कार्यकारी अधिकारी तृप्ती धोडमिसे यांनी दिले आहेत.
बेडग कमान पाडल्याबाबत सुरेखा कल्लाप्पा कांबळे यांनी दि. ५ जुलैरोजी प्रशासनास निवेदन दिले होते. त्यानंतर या प्रकरणाची चौकशी करण्यासाठी ग्रामपंचायत विभागाचे तत्कालीन उपमुख्य कार्यकारी अधिकारी तानाजी लोखंडे यांची चौकशी अधिकारी म्हणून नियुक्ती केली होती.
लोखंडे यांच्यासह मिरजेचे गटविकास अधिकारी यांनी समक्ष भेट देऊन याबाबत माहिती घेतली. तसेच त्यांनी ग्रामपंचायतीकडील कागदपत्रांची तपासणी केली होती. त्यामध्ये संबंधितांनी केलेली कारवाई हो ग्रामपंचायत अधिनियम १९५९ मधील कलम ५२ (२ अ) व ५३ (१) नियमानुसार सदोष आहे. त्यामुळे सरपंच, सदस्य आणि ग्रामसेवक यांना नोटीस दिली होती. सात दिवसांत खुलासा करण्याची सूचना केली होती. त्यानुसार ग्रामसेवकांनी खुलासा सादर केला आहे. मात्र खुलासा समाधानकारक नसल्याने सीईओ धोडमिसे यांनी ही कारवाई केली.
उच्च न्यायालयात ग्रामसेवकाची धाव
ग्रामसेवक बी. एल. पाटील यांनी जिल्हा परिषदेच्या कारवाईविरोधात उच्च न्यायालयात दावा दाखल केला आहे. जिल्हा परिषदेच्या कारणे दाखवा नोटिशीविरोधात दावा दाखल केला असून तिच्या आधारे कोणतीही कारवाई करण्यास विरोध दर्शविला आहे. सीईओ, उपमुख्य कार्यकारी अधिकारी, गटविकास अधिकारी, विस्ताधिकारी आणि बेडग ग्रामपंचायतीला नोटिशीच्या प्रती पाठवल्या असल्याची माहिती देण्यात आली.
