सांगली :खबऱ्या प्रतिनिधी: कव्वालीचा कार्यक्रम रंगात आला असताना इस्लामपूरमध्ये राष्ट्रवादी काँग्रेसच्या माजी नगरसेवकाने मंचावरच हवेत गोळीबार केल्याचा धक्कादायक प्रकार समोर आला असून पोलीसांनी पिस्टल ताब्यात घेतले आहे.
याबाबत मिळालेली माहिती अशी, सोमवारी रात्री ईद-ए-मिलाद निमित्त आझाद चौकामध्ये अमिल आरीफा साबरी दिल्ली यांचा कव्वालीचा कार्यक्रम आयोजित करण्यात आला होता. या कार्यक्रमासाठी राष्ट्रवादी काँग्रेसचे प्रदेशाध्यक्ष आ. जयंत पाटील हेही उपस्थित होते. काही काळ कार्यक्रमाचा आस्वाद घेतल्यानंतर त्यांनी कार्यक्रमस्थळावरून प्रस्थान केले.
त्यानंतर रात्री साडेअकरा वाजणेच्या सुमारास माजी नगरसेवक पीरअली पुणेकर यांनी मंचावरच एका कोपर्यामध्ये जाउन पिस्टलमधून हवेमध्ये गोळीबार केला. या घटनेची चित्रफित शुक्रवारी सकाळी समाजमाध्यमावर प्रसारित झाली. या कृत्याची पोलीसांनी तातडीने दखल घेत पुणेकर यांना सार्वजनिक ठिकाणी स्वत:च्या व इतरांच्या जिवीत धोक्यात आणल्याची तक्रार सरकारच्यावतीने सहायक उप निरीक्षक बाजीराव पाटील यांनी पोलीस ठाण्यात दाखल केली. पुणेकर यांचा पिस्टल बाळगण्याचा परवाना असला तरी त्याचा वापर करण्याच्या अटी व शर्थींचा भंग केला असून त्यांचे पिस्टल जप्त करण्यात आले आहे. या प्रकरणाचा तपास निरीक्षक शशीकांत चव्हाण हे करीत आहेत.
