मुंबई – राज्य मंत्रिमंडळाची साप्ताहिक बैठक आज मंत्रालयात पार पडली. मुख्यमंत्री उद्धव ठाकरे यांच्या प्रमुख उपस्थितीत ही बैठक झाली.
या बैठकीत काही महत्त्वाचे निर्णय घेण्यात आले आहेत. नगरविकास विभाग, ऊर्जा विभाग आणि कृषी विभागाशी संबंधित महत्त्वाचे आदेशही काढण्यात आले आहेत. त्यानुसार, सांगली आणि पुणे लोहगाव येथील खेळाच्या मैदानासाठी आरक्षण जागेबाबत महत्त्वाचा निर्णय घेतला आहे.
राज्य मंत्रिमंडळाची बैठक मंत्रालयात सुरू असताना अचानक वीज पुरवठा खंडित झाला. या बैठकीला मुख्यमंत्री उद्धव ठाकरे व्हिडीओ कॉन्फरन्सिंगच्या माध्यमातून उपस्थित होते. ओबीसी आरक्षण रद्द झाल्याच्या पार्श्वभूमीवर बैठकीत महत्त्वाची चर्चा सुरू होती. नेमकी याचवेळी लाईट गेली. त्यामुळे बैठकीचा खोळंबा झाल्याचेही पाहायला मिळालं.
११ मे २०२२ मंत्रिमंडळ बैठकीतील महत्त्वाचे निर्णय थोडक्यात
• सांगली महापालिका क्षेत्रातील खेळाच्या मैदानावरील आरक्षणातील भागश: बांधकाम व्याप्त क्षेत्र वगळण्यासाठी फेरबदलास मान्यता
(नगर विकास विभाग)
• लोहगाव (जि.पुणे) विमानतळाकडे क्रीडांगणाच्या जागेतून जाणाऱ्या रस्त्यासाठी आरक्षण बदल
(नगर विकास विभाग)
• महाऊर्जेकडे नोंदणी झालेल्या ४१८ मेगावॉट क्षमतेच्या प्रकल्पांना कार्यान्वित होण्यासाठी मुदतवाढ
(ऊर्जा विभाग)
वैयक्तिक लाभाच्या योजना पात्र लाभार्थ्यांपर्यंत पोहचविण्यासाठी आधार कार्डाशी जोडणार
(वित्त विभाग)
कापूस, सोयाबीन व इतर तेलबिया पिकांची उत्पादकता वाढविणे व मूल्य साखळी विकासासाठी विशेष कृती योजना राबविणार.
(कृषि विभाग)
